बैतडी, असोज २९ गते । जिल्ला प्रशासन कार्यालय बैतडीले नेपालीहरूको महान् चाड दशैँ तथा तिहारको समयमा जुवातास खेल्न/खेलाउन र अत्यधिक मदिरा सेवन गरी अशान्ति फैलाउन कडा प्रतिबन्ध लगाएको छ।
प्रशासनले बिहीबार एक सूचना जारी गर्दै चाडपर्वका नाममा नगद रकम, घरजग्गा, गरगहना वा अन्य चल-अचल सम्पत्ति दाउमा राखेर जुवातास खेल्ने, स्थान उपलब्ध गराउने तथा मदिरा सेवन गरी सार्वजनिक शान्ति-सुरक्षामा खलल पुर्याउने कार्य नगर्न चेतावनी दिएको छ।
प्रमुख जिल्ला अधिकारी मीना अर्यालद्वारा जारी सूचनामा जुवातास र असीमित मदिरा सेवनका कारण आर्थिक तथा सामाजिक असर पर्नुका साथै पारिवारिक कलह, घरेलु हिंसा, दुर्घटना र अन्य आपराधिक गतिविधि बढ्ने भएकाले यस्ता कार्यको नियन्त्रण गर्नु सबैको साझा दायित्व भएको उल्लेख छ।
प्रशासनले चाडपर्वलाई मर्यादित, सभ्य, सुरक्षित र शान्तिपूर्ण रूपमा मनाउन आग्रह गर्दै गैरकानुनी र अवाञ्छित गतिविधि भएको पाइएमा नजिकैको प्रहरी कार्यालय वा सम्बन्धित निकायमा खबर गर्न सर्वसाधारणलाई अनुरोध गरेको छ। सूचनाको उल्लङ्घन गरी गैरकानुनी गतिविधिमा संलग्न हुने व्यक्तिहरूमाथि प्रचलित कानुनबमोजिम कडा कारबाही गरिने प्रशासनले जनाएको छ।
