बैतडी, कार्तिक ५ गते । प्रधानमन्त्री कप एकदिवसीय क्रिकेटको बैतडी छनोट तथा बिडिसिए कप क्रिकेट प्रतियोगिताको २३औं संस्करण आगामी मंसिरमा हुने भएको छ।
बैतडी जिल्ला क्रिकेट संघको आयोजनामा सञ्चालन हुने उक्त प्रतियोगिता मंसिर १२ गतेदेखि सुरु हुनेछ। संघका सचिव श्यामबहादुर चन्दका अनुसार प्रतियोगिताका सम्पूर्ण खेलहरू दशरथचन्द क्रिकेट मैदान, सुन्दरखालीमा खेलाइने छन्।
प्रतियोगितामा सहभागी हुन चाहने इच्छुक क्लबहरूका लागि टिम दर्ता खुला गरिएको छ। सहभागिता जनाउने क्लबहरूले आगामी कात्तिक ३० गतेभित्र टिम दर्ता गराउनुपर्नेछ भने यसका लागि टिम दर्ता शुल्क १० हजार रूपैयाँ तोकिएको छ। यसका साथै, नयाँ दर्ता भएका क्लबहरूले पनि यस प्रतियोगितामा भाग लिन पाउने संघले जनाएको छ। प्रतियोगितासम्बन्धी अन्य विस्तृत विवरणहरू भने केही दिनमै सार्वजनिक गरिने सचिव चन्दले जानकारी दिनुभयो।
बैतडी जिल्ला क्रिकेट संघले नियमित रूपमा प्रत्येक वर्ष बिडिसिए कपको आयोजना गर्दै आएको छ। गत वर्ष सम्पन्न यस प्रतियोगिताको २२औं संस्करणको उपाधि निङ्गलाशैनी क्रिकेट क्लब (एनसिसि) ले जितेको थियो।
