बैतडी, असाेज २८ गते । बैतडीको पञ्चेश्वर गाउँपालिकाबाट प्रहरीले तीन लाख १७ हजार रुपैयाँभन्दा बढी मूल्यका भन्सार छली गरी ल्याइएका सामान बरामद गरेको छ ।
गोप्य सूचनाका आधारमा प्रहरी चौकी हल्दुविनायक र इलाका प्रहरी कार्यालय तस्वदेहीबाट खटिएको संयुक्त प्रहरी टोलीले सोमबार दिउँसो ३ बजे पञ्चेश्वर गाउँपालिका–४, विनायकघाट क्षेत्रबाट भन्सार छलीका सामान बरामद गरेको जिल्ला प्रहरी कार्यालय बैतडीले जनाएको छ ।
प्रहरीका अनुसार विनायकघाटबाट अवैध रूपमा भन्सार छली गरी ल्याइएका सामान सोही वडाको तिमलेखालीस्थित विनायक जङ्गलमा बेवारिसे अवस्थामा फेला परेका थिए ।
बरामद गरिएका सामानमा चिनी, तोरी तथा तिलको तेल, पेठा मिठाई, ध्वजा तथा नेजा, मन्दिरका घण्टी, रेडिमेड अचार, नरिवल, पापड, पेन्ट, चप्पल, सुर्ती, जिरा, स्टिलका भाँडाकुँडा, स्याम्पु, तालाचाबी, पास्ता र ढोकाका ह्यान्डललगायत २४ प्रकारका खाद्यान्न तथा घरायसी सामग्री रहेका छन् ।
प्रहरीका अनुसार बरामद सामानको अनुमानित मूल्य तीन लाख १७ हजार सात सय १० रुपैयाँ रहेको छ ।
बरामद गरिएका सामान आवश्यक कानुनी कारबाहीका लागि जिल्ला प्रहरी कार्यालय बैतडी ल्याउने प्रक्रिया अघि बढाइएको र घटनाबारे थप अनुसन्धान भइरहेको प्रहरीले जनाएको छ ।
