बैतडी, भदाै १२ गते । हरेक वर्ष श्रावण शुक्ल पूर्णिमाका दिन धार्मिक, सांस्कृतिक तथा सामाजिक महत्त्व बोकेको जनैपूर्णिमा तथा रक्षाबन्धन पर्व देशभर श्रद्धा र उल्लासका साथ मनाइँदैछ।
यस अवसरमा वैदिक सनातन धर्मावलम्बीले बिहानै नदी, ताल तथा तलाउमा स्नान गरी गुरु–पुरोहितबाट मन्त्रिएको नयाँ यज्ञोपवीत (जनै) तथा रक्षासूत्र (डोरो) धारण गर्ने प्रचलन छ। यसै दिन दिदीबहिनीले दाजुभाइको हातमा रक्षाबन्धनस्वरूप राखी बाँधेर आपसी प्रेम, सद्भाव र आत्मीयता साटासाट गर्ने चलनसमेत रहेको छ।
आफ्ना पुर्खा, ऋषि तथा महर्षिको स्मरण गर्दै जल तथा तर्पण अर्पण गरिने भएकाले यस पर्वलाई ऋषितर्पणीका रूपमा समेत मनाउने गरिन्छ। धार्मिक आस्था र पारिवारिक आत्मीयतासँग जोडिएको यस पर्वले परम्परा, संस्कार र सामाजिक एकताको सन्देशसमेत दिने गरेको छ।
जनैपूर्णिमाको अर्को विशेषता भनेको क्वाँटी हो। विभिन्न थरीका गेडागुडी भिजाएर टुसा उमार्दै तयार पारिने क्वाँटी यस दिन विशेष परिकारका रूपमा खाने गरिन्छ। पौष्टिकताका दृष्टिले समेत महत्त्वपूर्ण मानिने क्वाँटीले पर्वको सांस्कृतिक र स्वादको पक्षलाई थप विशेष बनाउने गरेको छ।
यसरी जनैपूर्णिमा धार्मिक आस्था, पारिवारिक प्रेम, सांस्कृतिक परम्परा र मौलिक खानपानको सुन्दर संगमका रूपमा पुस्तौँदेखि मनाइँदै आएको पर्व हो।
