- Advertisement -
वाशुलिङ बैतडी, माघ ८ गते । बैतडीमा ट्र्याक्टर दुर्घटना हुँदा एक जनाको मृत्यु भएको छ भने तीन जना घाइते भएका छन ।
धनगढी बाट दार्चुलातर्फ जाँदै गरेको म १ त १०१३ नम्बरको ट्र्याक्टर आज बिहान करिब ९ः३० बजे पाटन नगरपालिका–८ अनारखोलीमा दुर्घटनामा परेको हो । दुर्घटनामा परी दार्चुला जिल्लाका अन्दाजी २०–२१ वर्षका करन बुढामगरको घटनास्थलमै मृत्यु भएको जिल्ला प्रहरी कार्यालय बैतडीले जनाएको छ ।
दुर्घटनामा घाइते भएका तीन जनाको उद्धार गरी उपचारका लागि डडेल्धुरा अस्पताल पठाइएको छ ।
जिल्ला प्रहरी कार्यालय बैतडीका प्रवक्ता प्रहरी निरीक्षक सुरज सिंहका अनुसार ट्र्याक्टर अनियन्त्रित भई सडकबाट करिब ५० मिटर तल खसेको थियो । ट्र्याक्टरमा चालकसहित चार जना सवार थिए ।
दुर्घटनाको कारणबारे थप अनुसन्धान भइरहेको प्रहरीले जनाएको छ ।
