वाशुलिङ् समाचारदाता बैतडी , कार्तिक १७ गते ।
बैतडीको सुर्नया गाउँपालिकाका कार्यपालिका सदस्य दासी ढोलीको निधन भएको छ । ६५ वर्षीय ढोलीको उपचारका क्रममा निधन भएको हो ।
सुर्नया गाउँपालिका–१ हटैराज निवासी ढोली लामो समयदेखि मिर्गौला रोगबाट पीडित हुनुहुन्थ्यो । उहाँले नियमित डायलाइसिस गराउँदै आउनुभएको थियो । उपचारकै क्रममा उहाँको निधन भएको सुर्नया गाउँपालिका–१ का वडाध्यक्ष धनबहादुर चन्दले जानकारी दिनुभयो ।
ढोली २०७९ सालको स्थानीय तह निर्वाचनमा नेपाली कांग्रेसबाट गाउँ कार्यपालिका सदस्यमा निर्वाचित हुनुभएको थियो । दलित अधिकारका क्षेत्रमा लामो समयदेखि क्रियाशील उहाँ सामाजिक अभियन्ताका रूपमा समेत परिचित हुनुहुन्थ्यो ।
दलित समुदायको हकहित, सामाजिक सुधार र अधिकारका पक्षमा उहाँले सक्रिय भूमिका निर्वाह गर्दै आउनुभएको थियो ।उहाँको निधनले स्थानीय तहले एक जनप्रतिनिधि र समाजले दलित अधिकारका क्षेत्रमा क्रियाशील अभियन्ता गुमाएको स्थानीयले बताएका छन् । उहाँका श्रीमती र एक छोरा हुनुहुन्छ ।
यसैबीच, कार्यपालिका सदस्य ढोलीको निधनको शोकमा सुर्नया गाउँपालिकाले आज (मङ्गलबार) सार्वजनिक बिदा दिने निर्णय गरेको छ । गाउँपालिका अध्यक्ष अम्मरबहादुर कुँवरका अनुसार गाउँपालिका मातहतका सबै सरकारी कार्यालय, शिक्षण संस्था तथा स्वास्थ्य संस्थामा शोक बिदा दिइनेछ ।
अध्यक्ष कुँवरले ढोलीको निधनले गाउँपालिकालाई अपूरणीय क्षति पुगेको बताउनुभएको छ ।
