वासुलिङ् समाचारदाता ,बैतडी कार्तिक १७ गते ।
आगामी निर्वाचनका लागि बैतडीमा एक लाख ५४ हजार ९४४ मतदाता कायम भएका छन् । जिल्ला निर्वाचन कार्यालय बैतडीले मतदाता नामावली अद्यावधिक गरी सार्वजनिक गरेको अन्तिम विवरणअनुसार जिल्लामा पुरुषभन्दा महिला मतदाताको सङ्ख्या केही कम रहेको छ ।
कार्यालयका सूचना अधिकारी नरेश दयालद्वारा जारी विवरणअनुसार जिल्लामा ७८ हजार १८६ पुरुष, ७६ हजार ७५२ महिला र तीन जना अन्य मतदाता रहेका छन् । २०८३ साल भदौ १५ गतेसम्म १८ वर्ष उमेर पूरा भएका नागरिकलाई समेटेर मतदाता नामावली अद्यावधिक गरिएको हो ।
निर्वाचन क्षेत्रगत विवरणअनुसार क्षेत्र नम्बर १ मा ७६ हजार ६४ मतदाता रहेका छन् । तीमध्ये ३८ हजार ६०८ पुरुष, ३७ हजार ४५५ महिला र एक जना अन्य मतदाता छन् । यस्तै, क्षेत्र नम्बर २ मा ७८ हजार ८८० मतदाता कायम भएका छन् । यस क्षेत्रमा ३९ हजार ५८१ पुरुष, ३९ हजार २९७ महिला र दुई जना अन्य मतदाता रहेका छन् ।
जिल्लाका १० स्थानीय तहमध्ये सबैभन्दा बढी मतदाता दशरथचन्द नगरपालिकामा रहेका छन् । दशरथचन्दमा २३ हजार २६३ मतदाता रहेका छन् भने पुर्चौडी नगरपालिकामा २१ हजार ५६८ र पाटन नगरपालिकामा २० हजार ७५२ मतदाता रहेका छन् ।
यसैगरी दोगडाकेदार गाउँपालिकामा १५ हजार १९०, मेलौली नगरपालिकामा १४ हजार १०, डिलासैनी गाउँपालिकामा १३ हजार ९२७, सिगास गाउँपालिकामा १२ हजार ८९०, सुर्नया गाउँपालिकामा ११ हजार ७६६ र पञ्चेश्वर गाउँपालिकामा ११ हजार ३५७ मतदाता रहेका छन् । सबैभन्दा कम शिवनाथ गाउँपालिकामा १० हजार २२१ मतदाता रहेका छन् ।
निर्वाचन आयोगको निर्देशिकाबमोजिम मतदाता नामावली अद्यावधिकको प्रक्रिया सम्पन्न गरी अन्तिम विवरण सार्वजनिक गरिएको जिल्ला निर्वाचन कार्यालयले जनाएको छ ।
