नेपाली कांग्रेसको प्रशिक्षण तथा अभिमुखीकरण कार्यक्रम पोखरामा जारी छ । आज कांग्रेसले जिल्ला सभापतिहरू र जिल्ला प्रशिक्षण शाखा प्रमुखहरूलाई प्रशिक्षण दिइरहेको छ ।
पार्टी उपसभापति पूर्णबहादुर खड्का नेतृत्वमा रहेको पार्टीको केन्द्रीय नीति, अनुसन्धान तथा प्रशिक्षण प्रतिष्ठानले ७७ जिल्ला सभापतिहरू र प्रशिक्षण शाखा प्रमुखहरूलाई प्रशिक्षण दिने व्यवस्था गरेको हो । प्रतिष्ठानको आयोजना र गण्डकी प्रदेश कार्यसमितीको व्यवस्थापनमा प्रशिक्षण तथा अभिमुखीकरण कार्यक्रम संञ्चालन गरिएको हो ।
जिल्ला सभापति र प्रशिक्षण शाखा प्रमुखहरूका लागि आयोजना गरिएको कार्यक्रमलाई सभापति शेरबहादुर देउवाले मंगलबार उद्घाटन गर्नुभयो । संगठन सुदृढीकरण तथा समसामयिक सन्दर्भमा ७७ बटै जिल्लाका सभापतिहरुलाई कांग्रेसले प्रशिक्षण दिएको हो । प्रशिक्षण कार्यक्रम बुधबारसम्म चल्नेछ ।
सभापतिहरुलाई महामन्त्री गगन थापा र विश्वप्रकाश शर्मालगायत पदाधिकारी तथा विज्ञहरूले प्रशिक्षण दिने जनाइएको छ । यसअघि कांग्रेसले पोखरामै प्रदेश सभापतिहरू र प्रदेश प्रशिक्षण विभाग प्रमुखहरूका लागि प्रशिक्षण तथा अभिमुखीकरण कार्यक्रम गरेको थियो ।
