चैत १ गते। बैतडीमा झन्डै १७ हजार राष्ट्रिय परिचयपत्र कार्यालयमा थन्किएका छन् । सेवाग्राहीले लिन नआउँदा छपाइ भएर आएका १६ हजार ९०८ थान राष्ट्रिय परिचय पत्र कार्यालयमै रहेको जिल्ला प्रशासन कार्यालय बैतडीका सूचना अधिकारी पवन कुमार शाहीले जानकारी दिनुभयो ।
एक वर्ष पहिले नै २० हजार परिचयपत्र जिल्लामा पुगेको भए पनि तीन हजार ९२ परिचयपत्र मात्रै वितरण भएको उहाँले बताउनुभयो ।
राष्ट्रिय परिचयपत्र लिन आउँदा फाराम भर्दा जस्तै बायोमेट्रिक प्रणालीबाट रुजु गर्नुपर्ने र प्रणालीले सबै मिलेको जनाएपछि परिचय पत्र दिन मिल्ने सूचना अधिकारी शाहीले बताउनुभयो ।
‘राष्ट्रिय परिचय पत्र छपाई भएसकेपछि जिल्ला प्रशासन कार्यालयमा पुगिसकेको जानकारी सम्बन्धीत व्यक्तिको मोवाइलमा पुग्ने गर्छ , ‘ उहाँले भन्नुभयो, ‘कतिपय अवस्थामा त्यस बारेमा जानकारी नहुँदा परिचय पत्र लिन नआएका हुन सक्छन् । ‘
अध्ययन तथा रोजगारीका लागि जिल्लाबाहिर भएकाले राष्ट्रिय परिचय पत्र लिन नआएको हुन सक्ने उहाँको भनाई छ । भौगोलिक विकटता भएका कारणले पनि अत्यावश्यक भएमात्रै राष्ट्रिय परिचयपत्र लिन आउने गरेको जिल्ला प्रशासन कार्यालयले जनाएको छ।
बैंक खाता खोल्नेलगायतका अत्यावश्यक काममा सरकारले राष्ट्रिय परिचयपत्र अनिवार्य गरेको छ । जिल्ला प्रशासन कार्यालयबाट अहिले पनि राष्ट्रिय परिचयपत्रका लागि विवरण संकलनको काम भैरहेको कम्प्युटर अपरेटर सुरेन्द्रदेव भट्टले बताउनुभयो ।
राष्ट्रिय परिचयपत्र लिने भन्दा फाराम भर्नेको संख्या बढिरहेको कम्प्युटर अपरेटर भट्टले बताउनुभयो । दैनिक ९० देखि १०० जना सम्म राष्ट्रिय परिचयपत्रका लागि फाराम भर्न आउने गरेको उहाँले जानकारी दिनुयभयो । छपाइ भएर जिल्लामा पुगेको परिचय पत्र लिनका लागि ८/१० जना मात्रै आउने गरेका कम्प्युटर अपरेटर भट्टले बताउनुभयो ।
बैतडीमा राष्ट्रिय परिचय पत्रका लागि १ लाख २२ हजार ९२० जनाको विवरण संकलन गरिएको जिल्ला प्रशासन कार्यालय बैतडीले जनाएको छ ।
