बैतडी । फागुन २१ गते हुने प्रतिनिधि सभा सदस्य निर्वाचनलाई मध्यनजर गर्दै बैतडीमा मदिराजन्य पदार्थ बिक्रीबितरणमा तथा ओसारपसारमा कडाइ गरिएको छ । निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न जिल्लामा मदिराजन्य पदार्थ बिक्रीबितरणमा कडाइ गरिएको हो ।
शनिवारदेखी नै लागू हुने गरि निर्वाचन सम्पन्न नभएसम्म साँझ ७ बजेपछि मदिरा बिक्रीबितरण गर्न नपाइने जिल्ला प्रशासन कार्यालय बैतडीका प्रशासकीय अधिकृत भोजलाल थारुले जानकारी दिनुभयो । मदिराजन्य पदार्थ बिक्रीबितरण तथा ओसारपसार नियमनका लागि बिक्रीबितरण र उपभोगलाई व्यवस्थीत गर्न आज व्यवसायीहरुसंग छलफल गरेर कडाई गर्ने निर्णय भएको उहाँले बताउनुभयो ।
मौन अवधीमा मदिराजन्य बस्तुको बिक्रीबितरण पूर्ण रुपमा निषेध गर्ने, फागुन ११ गतेदेखी २४ गतेसम्म मदिरा दुवानी तथा ओसारपसार नगर्ने निर्णय गरिएको प्रशासकीय अधिकृत थारुले जानकारी दिनुभयो ।
“व्यवसायीहरुसंगको छलफलपछि मदिराजन्य पदार्थ बिक्रीबितरण तथा ओसारपसार नियमन गर्ने निर्णय गरेका छौ।”, उहाँले भन्नुभयो, “यदी उक्त निर्णयको उल्लघंन गरेको पाइएमा प्रचलित कानुन बमोजिम कारवाही हुन्छ ।
फागुन २१ गते हुने प्रतिनिधि सभा सदस्य निर्वाचनका लागि बैतडीमा ११ जना चुनावी मैदानमा छन् ।
