वाशुलिङ बैतडी, माघ ७ गते — बैतडीमा मंगलबार उम्मेदवारी दर्ता गराएका कुनै पनि उम्मेदवारविरुद्ध उजुरी नपरेको छ। उम्मेदवारविरुद्ध उजुरी दिनका लागि तोकिएको समयसीमाभित्र बुधबार दिउँसो ३ बजेसम्म कुनै पनि उजुरी नपरेको मुख्य निर्वाचन अधिकृत तिर्थराज भट्टले जानकारी दिनुभयो।
आगामी फागुन २१ गते हुने प्रतिनिधिसभा सदस्य निर्वाचनका लागि बैतडीमा दुई स्वतन्त्रसहित १२ जनाले उम्मेदवारी दर्ता गराएका छन्। उम्मेदवारी दर्ता गर्नेहरूमा नेकपा (एमाले)बाट दामोदर भण्डारी, नेपाली कांग्रेसबाट चतुरबहादुर चन्द, नेपाली कम्युनिष्ट पार्टीबाट प्रमानन्द भट्ट, राष्ट्रिय प्रजातन्त्र पार्टीबाट भूपेनबहादुर चन्द तथा राष्ट्रिय स्वतन्त्र पार्टीबाट हरिमोहन भण्डारी रहेका छन्।
यसैगरी नेपाल कम्युनिष्ट पार्टी (माओवादी)बाट रामसिंह कुँवर, जनता समाजवादी पार्टी नेपालबाट आनसिंह भण्डारी, नेपाल मजदुर किसान पार्टीबाट नवराज कोइराला, आमजनता पार्टीबाट विसनसिंह बोहरा र श्रम संस्कृति पार्टीबाट गजेन्द्रराज पाण्डेयका साथै जयप्रकाश पन्त र तेजबहादुर चन्दले स्वतन्त्र उम्मेदवारी दर्ता गराउनु भएको थियाे ।
