(वाशुलिङ) बैतडी, असोज २६ — पाटन फिडरअन्तर्गतको विद्युत् सेवा आइतबार दिउँसो केही घण्टाका लागि अवरुद्ध भएको छ । खोड्पे–ठाडदेखि पाटन सुर्नया गाडसम्मको लाइनमा बारम्बार देखिएको समस्या समाधान गर्न तथा लाइनमा झुन्डिएका रुखका हाँगा–बिँगा हटाउने कार्यका कारण विद्युत् आपूर्ति रोकिएको नेपाल विद्युत प्राधिकरण, बैतडी वितरण केन्द्रले जनाएको छ ।
वितरण केन्द्रका प्रमुख जनार्दन पौडेलका अनुसार आज दिउँसो १२:२० बजेदेखि २:०० बजेसम्म लाइन मर्मत तथा सरसफाइ कार्य भइरहेकाले सो समय अवधिमा ठाडदेखि अगाडिका क्षेत्र—पाटन नगरपालिका, पुर्चौडी नगरपालिका, सिगास गाउँपालिका र सुर्नया गाउँपालिकाका अधिकांश क्षेत्रमा विद्युत् सेवा अवरुद्ध भएको हो ।
उनका अनुसार सुर्नया गाउँपालिकाका केही क्षेत्रमा अझै थप मर्मत कार्य चलिरहेको भएकाले सो क्षेत्रमा आज अपरान्ह ४:३० बजेसम्म विद्युत् सेवा अवरुद्ध रहनेछ ।
प्राधिकरणले सम्भावित असुविधाका लागि ग्राहकहरूसँग क्षमायाचना गर्दै मर्मतका क्रममा वा लाइन नजिक काम गर्दा विशेष सावधानी अपनाउन आग्रह गरेको छ । साथै, जुनसुकै बेला पनि लाइनमा विद्युत् प्रवाह हुन सक्ने भएकाले पोल, तार वा अन्य उपकरण छुनेजस्ता जोखिमपूर्ण कार्य नगर्न उपभोक्तालाई सचेत गराइएको छ ।
