बैतडी – वर्षासँगै आएको हावाहुरीका कारण सल्लाको रुख ढल्दा पाटन नगरपालिका–१ स्थित सकार स्वास्थ्यचौकी भवनमा ठूलो क्षति पुगेको छ ।
शुक्रबार दिउँसो करिब २ बजेतिर आएको हावाहुरीले ढलेको सल्लाको रुख स्वास्थ्यचौकीको चारकोठे भवनमाथि खस्दा एक कोठा पूर्ण रुपमा नष्ट भएको छ भने अर्काे कोठामा आंशिक क्षति पुगेको हो ।
स्वास्थ्यचौकीका प्रमुख नरेन्द्रराज भट्टराईका अनुसार प्रयोगशालाको रुपमा प्रयोग भइरहेको कोठामा रुख खस्दा त्यहाँ रहेका सामग्री र महत्वपूर्ण कागजातहरू पूर्ण रुपमा नष्ट भएका छन् । त्यस्तै, कुपोषित बालबालिकाको उपचारका लागि सञ्चालन गरिएको ओटिसी कक्षमा समेत आंशिक क्षति पुगेको छ ।
प्रारम्भिक अनुमानअनुसार स्वास्थ्यचौकीमा करिब तीन लाख रुपैयाँ बराबरको क्षति भएको बताइएको छ । साथै, प्रयोगशाला सेवा तत्कालका लागि अवरुद्ध भएको प्रमुख भट्टराईले जानकारी दिएका छन् ।
