- Advertisement -
बैतडी, असाेज १९ गते – बैतडीमा पेन्सन बुझ्न जाँदै गरेका बैतडीका एक वृद्धको बाटोमै बेहोस भएपछि उपचारका क्रममा मृत्यु भएको छ । मृत्यु हुनेमा सुर्नया गाउँपालिका–२ का ६० वर्षीय डम्बरबहादुर चन्द रहेका छन् ।
जिल्ला प्रहरी कार्यालय बैतडीका अनुसार सोमबार बिहान सवारी साधन (जीप) मा सवार भई बैतडी सदरमुकाम गोठलापानी जाने क्रममा दशरथचन्द नगरपालिका–१, गुरुखोला आइपुग्दा चन्द अचानक बेहोस भएका थिए ।
जीपमै अचेत भएका चन्दलाई तत्काल उद्धार गरी उपचारका लागि जिल्ला अस्पताल बैतडी पु¥याइएको थियो । तर, अस्पतालमा उपचारकै क्रममा निधन भएको जिल्ला प्रहरी कार्यालय बैतडीका सूचना अधिकारी एवं प्रहरी निरीक्षक सुरज सिंहले जानकारी दिए ।
यसैबिच मृतक चन्दको शव पोस्टमार्टम पश्चात् आफन्तको जिम्मा लगाइएको जिल्ला प्रहरी कार्यालय बैतडीले जनाएको छ।
