ताप्लेजुङ, असोज ६ गते । नेपाली कांग्रेसले ताप्लेजुङका ६१ वटै वडामा नयाँ नेतृत्व चयन गरेको छ । आइतबार र सोमबार सम्पन्न भएको वडा अधिवेशनमार्फत कांग्रेसले जिल्लाका सबै वडामा नयाँ नेतृत्व चयन गरेको हो ।
काँग्रेस जिल्ला सभापति गजेन्द्रप्रसाद तुम्याहाङका अनुसार ६१ वटै वडामा वडा कार्यसमितिको नेतृत्व सर्वसम्मत चयन भएको छ । जिल्लाका अधिकांस वडामा आइतबार नै वडा अधिवेशनहरु सम्पन्न भएका र बाँकी रहेको वडामा सोमबार अधिवेशनहरु सम्पन्न गरिएको जिल्ला सभापति तुम्याहाङले जानकारी दिनुभयो ।
उहाँका अनुसार केही वडाहरुमा नेतृत्वका लागि एक जनाभन्दा बढीले आकाङ्क्षा देखाए पनि आपसी समन्वय र समझदारीमा नेतृत्व सर्वसम्मत नै चयन गर्न वडा अधिवेशनहरु सफल भएका छन् ।
वडा अधिवेशनहरु सम्पन्न भएसँगै अबको बुधबार पालिका अधिवेशन र शनिबार महाधिवेशन प्रतिनिधि छनोटका लागि प्रदेश निर्वाचन क्षेत्रस्तरीय अधिवेशन गर्ने तयारी रहेको सो पार्टीले जनाएको छ । ताप्लेजुङमा नौ वटा स्थानीय तह र दुईवटा प्रदेश निर्वाचन क्षेत्र रहेका छन् ।
