बैतडी, असोज १९ गते । पाटन नगरपालिका–१० स्थित ब्रह्म आधारभूत विद्यालयमा शिक्षक नियुक्तिको विषयलाई लिएर तालाबन्दी गरिएको छ । शिक्षक नियुक्ति प्रक्रिया निष्पक्ष नभएको आरोप लगाउँदै परीक्षामा सहभागी एक परीक्षार्थीले विद्यालयमा तालाबन्दी गरेकी हुन् ।
विद्यालयको आधारभूत तहमा नेपाली विषयको शिक्षक नियुक्तिका लागि पाटन नगरपालिकाले आइतबार परीक्षा सञ्चालन गरेको थियो । परीक्षामा राधिका कुमारी पन्त, यशोदा भट्ट, सुरेशप्रसाद पन्त र मानमती अवस्थी पन्त सहभागी भएका थिए । परीक्षाबाट राधिका कुमारी पन्त शिक्षक पदमा छनोट भएकी छन् ।
शिक्षक नियुक्ति प्रक्रिया निष्पक्ष नभएको भन्दै परीक्षामा अनुत्तीर्ण यशोदा भट्टले सोमबार बिहान विद्यालयमा तालाबन्दी गरेको जनाइएको छ ।
पाटन नगरपालिकाका शिक्षा शाखा प्रमुख ललितकुमार पाण्डेयले भने शिक्षक नियुक्तिमा कुनै प्रकारको पक्षपात नभएको बताउनुभयो । परीक्षामा सहभागीमध्ये एक जना मात्रै दोस्रो चरणमा प्रवेश गरेको र उहाँ नै शिक्षक पदमा छनोट भएको उहाँले बताउनुभयो ।
“परीक्षामा सहभागीमध्ये एक जना मात्रै दोस्रो चरणमा प्रवेश गर्नुभएको थियो । उहाँ नै शिक्षक पदमा उत्तीर्ण हुनुभएको हो,” उहाँले भन्नुभयो ।
