बैतडी, असोज ६ गते । नेपाली कांग्रेसको १५औँ महाधिवेशनअन्तर्गत बैतडीमा नगर तथा गाउँ अधिवेशनको क्रम जारी रहँदा चार स्थानीय तहमा नेतृत्व चयन भएको छ। असोज ६ गते सम्पन्न अधिवेशनबाट जिल्लाका चार पालिकामा सभापतिसहित कार्यसमिति चयन गरिएको हो।
अधिवेशनबाट दशरथचन्द नगरपालिकाको सभापतिमा रणबहादुर बोहरा, पाटन नगरपालिकामा रमेश महरा, डिलासैनी गाउँपालिकामा देवराज जोशी र सिगास गाउँपालिकामा दीपक धामी निर्वाचित हुनुभएको छ।
पालिकास्तरमा नेतृत्व चयनसँगै स्थानीय तहमा पार्टीका आगामी गतिविधि सञ्चालनका लागि नयाँ कार्यसमितिले जिम्मेवारी पाएको छ। अधिवेशनले पालिकामा संगठन विस्तार, कार्यकर्ता परिचालन तथा पार्टीका गतिविधिलाई स्थानीयस्तरसम्म प्रभावकारी बनाउने जिम्मेवारीसमेत नयाँ नेतृत्वलाई दिएको छ।
नेतृत्व चयनका क्रममा पालिकास्तरमा रहेका नेता तथा कार्यकर्ताको सहभागिता रहेको थियो। अधिवेशनबाट निर्वाचित सभापति, पदाधिकारी तथा सदस्यहरूलाई पार्टीका नेता तथा कार्यकर्ताले बधाई तथा सफल कार्यकालको शुभकामना दिएका छन्।
नेपाली कांग्रेसको महाधिवेशनअन्तर्गत यसअघि जिल्लाका विभिन्न वडामा अधिवेशन सम्पन्न भइसकेका छन्। वडा तहपछि पालिकास्तरमा नेतृत्व चयनको प्रक्रिया अघि बढेसँगै जिल्लामा महाधिवेशनसम्बन्धी संगठनात्मक गतिविधि थप सक्रिय बनेको छ।
बाँकी स्थानीय तहमा पनि निर्धारित प्रक्रिया र कार्यक्रमअनुसार अधिवेशन सम्पन्न हुँदै जाने कांग्रेस बैतडीले जनाएको छ।
