वाशुलिङ बैतडी । बैतडीको दोगडाकेदार गाउँपालिकाले १६ औँ राष्ट्रपति रनिङ शिल्ड प्रतियोगितामा स्वर्ण पदक जितेर जिल्लाको गौरव बढाएकी खेलाडी सुनिता पार्कीलाई नगदसहित सम्मान गरेको छ।
सुदूरपश्चिम प्रदेशको प्रतिनिधित्व गर्दै प्रतियोगितामा उत्कृष्ट प्रदर्शन गरेकी दोगडाकेदार गाउँपालिका–८ स्थित रौलेश्वर माध्यमिक विद्यालय, कालागाउँमा अध्ययनरत छात्रा पार्कीले हाइजम्प विधामा स्वर्ण पदक जितेकी थिइन्। हालै काठमाडौंमा सम्पन्न प्रतियोगितामा उनको सफलताले सुदूरपश्चिमलाई स्वर्ण पदक दिलाएको हो।
गाउँपालिकाले पार्कीलाई १० हजार ५५५ रुपैयाँ नगद पुरस्कारसहित सम्मान गरेको गाउँपालिका उपाध्यक्ष पार्वती कार्कीले जानकारी दिइन्। खेलकुद क्षेत्रमा उत्कृष्ट नतिजा हासिल गर्ने प्रतिभावान खेलाडीलाई प्रोत्साहन गर्ने उद्देश्यले सम्मान गरिएको उनले बताइन्।
गाउँपालिका अध्यक्ष चक्रबहादुर कार्कीले स्वर्ण विजेता सुनिता पार्कीको उच्च शिक्षाका लागि गाउँपालिकाले आवश्यक पहल गर्ने प्रतिबद्धता व्यक्त गरे। उनले यस्ता प्रतिभाशाली खेलाडीलाई निरन्तर सहयोग र प्रोत्साहन आवश्यक रहेको उल्लेख गरे।
यसैबीच, जिल्ला खेलकुद समिति बैतडीले पनि सुदूरपश्चिमको प्रतिनिधित्व गर्दै स्वर्ण पदक जित्ने खेलाडीहरूलाई नगदसहित सम्मान गर्ने जनाएको छ। समितिका अध्यक्ष भुपेन्द्र चन्दका अनुसार बैतडीबाट स्वर्ण पदक जित्ने प्रत्येक खेलाडीलाई ५ हजार ५ सय ५५ रुपैयाँ नगद पुरस्कार प्रदान गरिनेछ।
१६ औँ राष्ट्रपति रनिङ शिल्ड प्रतियोगितामा बैतडीबाट सुदूरपश्चिम प्रदेशको प्रतिनिधित्व गरेका पाँच जना खेलाडीले स्वर्ण पदक जित्दै जिल्लाको खेलकुद क्षेत्रमा उल्लेखनीय सफलता हासिल गरेका थिए ।
